ಫಿರ್ಗಜಿಚಿ ಚರಿತ್ರಾ 

ತೆನ್ಕಾ ಕುಶಿನ್ ಚಮ್ಕುಂಚ್ಯಾ ರಸ್ತ್ಯಾ ದೆಗೆಕ್ ಬಡ್ಗಚ್ಯಾನ್ ವಾಳ್ಚ್ಯಾ ನಂಯ್ಚೆ ಬಗ್ಲೆಕ್ ಮಾಡಿಯೆ, ಮಾಡ್, ರೂಕ್ ಝಡಾಂ ಮಧೆಂ ವಿಶಾಲ್ ಉಬಾರ್ ದೊಂಗ್ರಾರ್, ಪ್ರಶಾಂತ್ ವಾತಾವರಣಾಂತ್ ಪಕೃತೆಚಾ ಸೊಭಾಯೆಂತ್ ಪರ್ಜಳ್ಚಾ ಸರ್ವಾಂಕ್ ಅಪ್ಲ್ಯಾ ಕುಶಿನ್ ಆಕರ್ಷಿತ್ ಕರ್ಚ್ಯಾ ಸೊಭಿತ್ ಸುಂದರ್ ರಿತಿನ್ ಸೊಬ್ಚೆ ಜೆಜುಚಾ ಪವಿತ್ರ್ ಕಾಳ್ಚಾಕ್ ಸಮರ್ಪಿಲ್ಲೆ ದೇವ್ ತೇಂಪ್ಲ್ ಶಂಭೂರು.

25 ವರ್ಸಾಂ ಪಯ್ಲೆಂಚೆ ಇತಿಹಾಸ್ ಹ್ಯಾ ಫಿರ್ಗಜೆಚೆಂ. ಶಂಭೂರ್ ಫಿರ್ಗಜ್ ಬೊರಿಮಾರ್ ಫಿರ್ಗಜೆಚೊ ಏಕ್ ವಾಂಟೊ. 1993 ವರಸ್ ಬೊರಿಮಾರ್ ಫಿರ್ಗಜೆಕ್ ಶತಮಾನೋತ್ಸವಚೆಂ ವರಸ್. ಹ್ಯಾ ವರ್ಸಾ ಗೊವ್ಳಿಬಾಪಾಲಾಗಿಂ ವಿನಂತಿ ಕೆಲ್ಯಾರ್ ಶಂಭೂರು ಕುಶಿಕ್ ಆಸ್ಚ್ಯಾ 2 ವಾಡ್ಯಾಗಾರಾಂಕ್ ಕೊಪೆಲ್ ಬಾದುಂಕ್ ಏಕ್ ಆವ್ಕಾಸ್ ಆಸಾ ಮ್ಹಣ್ ತವಳ್ಚೊ ವಿಗಾರ್ ಬಾಪ್ ಪೀಟರ್ ಫೆರ್ನಾಂಡಿಸ್ ಬಾಪಾನಿಂ ತಿಳ್ಸಿಲೆಂ ತ್ಯಾ ವೆಳಾರ್  ಲೊಕಾಚಿ ಹುಮೆದ್ ಚಡ್ಲಿ ಆನಿಂ ಜಾಗ್ಯಾಚಿ ವಿಲೆವಾರಿ ಕೆಲಿ. 2 ವಾಡೊ ಸಾಂಗಾತಾ ಮೆಳೊನ್ ಯೋಜನ್ ರೂಪಿತ್ ಕೆಲೆಂ.

1993 ತ್ ಬೊರಿಮಾರ್ ಫಿರ್ಗಜೆಕ್ ಗೊವ್ಳಿಕ್ ಭೆಟ್ ಆಸ್‌ಲ್ಲಿ. ಹ್ಯಾ ವೆಳಾರ್ ಲೊಕಾನಿಂ ವಿಗಾರಾ ಸಂಗಿ ಗೊವ್ಳಿಬಾಪಾಂಕ್ ಮೆಳೊನ್ ಬೊರಿಮಾರ್ ಫಿರ್ಗಜೆಚಾ  ಶತಮಾನೋತ್ಸವಚಾ ಉಗ್ಡಾಸಾಕ್ ಶಂಭೂರಾoತ್ ಏಕ್ ಕೊಪೆಲ್ ಜಾಂವ್ಕ್ ಮನವಿ ಅರ್ಪಿಲಿ. ತ್ಯಾ ನಂತರ್ ಗೊವ್ಳಿಬಾಪ್ ಅಧಿಕ್ ಮಾನಾಧಿಕ್ ದೊ. ಬಾಜಿಲ್ ಸಾಲ್ವಾದೊರ್ ಬಾಪಾಂನಿ ಕಾಬ್ಲಾತ್ ದಿಲಿ. ಉಪ್ರಾಂತ್ ಕೊಪೆಲ್ ಬಾದುಂಕ್ ಜಾಯ್ ಪುರ್ತೊ ಜಾಗೊ ಮಾನೆಸ್ತ್ ಲುವಿಸ್ ಕ್ರಾಸ್ತಾನ್ ಅನಿ ಶ್ರೀ ಅಂತೊನಿ ಮ್ಹೊನಿಸ್ ದೊಗಾ ಜಣಾಂನಿ ಜಾಗೊ ದಾನ್ ದಿಲೊ.ಸುರ್ವೆರ್ ಲ್ಹಾನ್ ಗೊವ್ಳೆಲ್ ಗಾಲ್ನ್ ಗರ್ಜೆವಂತಾoಕ್ ಮ್ಹಣ್ಜೆ ಪ್ರಾಯ್ವಂತಾoಕ್ ಆನಿಂ ಪಿಡೆಸ್ತಾಂ ಖಾತಿರ್ ಮೀಸಾಂ ಬೆಟಯ್ಲಿಂ. ಉಪ್ರಾಂತ್ ಕೊಪೆಲಾಚೆಂ ಬಾಂದಾಪ್ ಹಾತಿ ಘೆತ್ಲೆಂ. 1991 ತ್ ಆರಂಭ್ ಕರ್ನ್, 1994 ಕ್ ಏಕ್ ನೊವೆಂ ಬಾಂದಪ್ ಬಾಂದುನ್ 1994 ಫೆಬ್ರವರಿ 1 ತಾರಿಕೆರ್ ಗೊವ್ಳಿ ಬಾಪಾನಿಂ ಉದ್ಗಾಟನ್ ಕೆಲೆಂ.

ತ್ಯಾ ನಂತರ್ ಹೆರ‍್ಯೇಕಾ ಆಯ್ತಾರಾ ಮೀಸ್, ಭುರ್ಗ್ಯಾಂಕ್ ದೊತೊರ್ನ್ ನೊವೆನಾಂ, ಸಂಗಿ ಆತ್ಮಿಕ್ ಅಟೊವ್ ಚಲ್ತಾಲೊ. 1996 ಫೆಭ್ರವರಿ 6 ತಾರಿಕೆರ್ ನವ್ಯಾ ಇಗರ್ಜೆಚೆಂ ಬಾಂದಾಪ್ ಉದ್ಘಾಟನ್ ಕೆಲೆಂ. ತ್ಯಾ ನಂತರ್ ಲೊಕಾಚ್ಯೊ ಗರ್ಜೊ ಹಾಂಗಾಸರ್ ಚಲ್ತಾಲ್ಯೊ. ಲೊಕಾಚೊ ಅತ್ರೇಗ್ ಅನಿಕೀ ಚಡ್ ಜಾಲೊ. ವಿಗಾರಾ ಸಂಗಿ ಮೆಳೊನ್ ಗೊವ್ಳಿ ಬಾಪಾಂಕ್ ಮನವಿ ಅರ್ಪಿಲಿ. ಹ್ಯಾ ವೆಳಾರ್ ಗೊವ್ಳಿ ಬಾಪಾನಿಂ ಮನವಿ ಸ್ವೀಕಾರ್ ಕರುನ್ ಜೆಜುಚಾ ಪವಿತ್ರ್ ಕಾಳ್ಜಾಚಾ ಶಂಭೂರ್ ಫಿರ್ಗಜೆಕ್ 1998, ಮೇ 23 ವೆರ್  ನೊವೊ ವಿಗಾರ್ ಜಾವ್ನ್ ಬಾಪ್ ಸ್ಟ್ಯಾನಿ ಲೋಬೊಕ್ ಧಾಡ್ನ್ ಕೊಪೆಲ್ ಅಸ್‌ಲ್ಲೆಂ ನವಿ ಫಿರ್ಗಜ್ ಮ್ಹಣೊನ್ ಅಧಿಕೃತ್ ರಿತಿನ್ ಪಾಚಾರ‍್ಲೆಂ. ತವೊಳ್ ಥಾವ್ನ್ ಆಜಿಕ್ ಪರ್ಯಾಂತ್ ಸಬಾರ್ ಅಭಿವೃಧ್ದಿ ಹಾಂಗಾಸರ್ ಜಾಲ್ಯಾ. ಫಿರ್ಗಜೆಚಿ ಅರ್ಥಿಕ್ ಪರಿಸ್ಥಿತಿ ಸುಧಾರ‍್ಲ್ಯಾ. ಸುಮಾರ್ 20 ವರ್ಸಾಂ ಫುಡೆಂ ಆಸ್‌ಲ್ಲೊ ಹೊ ಗುಡೊ ಆಜ್  ಏಕ್ ಸುಂದರ್ ಯಾತ್ರಿಕ್ ಜಾಗ್ಯಾಪರಿ ಸೊಭ್ತಾ.